Bul  týraly qoǵamdyq komýnıkasıa ortalyǵynda ótken brıfıńte Mańǵystaý oblysy ákiminiń orynbasary Qanybek Jumashev málim etti.

Búgin QR prezıdenti el aýmaǵynda engizilgen tótenshe jaǵdaı toqtatylǵanyn málimdedi. Sonymen qatar, koronavırýstyń qazirgi ahýaly saralanyp, keı óńirlerdegi derttiń báseńdemeı otyrǵandyǵy jáne halyqtyń densaýlyǵyna áli de qaýip bar ekendigi rastaldy.

Osyǵan oraı, Qazaqstan Respýblıkasy aýmaǵynda tótenshe jaǵdaı rejımi aıaqtalǵanymen Mańǵystaý oblysynda karantın rejımi men shekteý sharalary 11 mamyr tańǵy saǵat 07:00 bastap 25 mamyrdyń 07:00 saǵatyna deıin uzartyldy.

Memleket basshysy «Tótenshe jaǵdaı rejımin qamtamasyz etý jónindegi komısıa Ekonomıkalyq ósimdi qalpyna keltirý jónindegi memlekettik komısıa» bolyp qaıta qurylatyndyǵyn atap ótti.

Jalpy tótenshe jaǵdaı rejımi kezeńinde halyqtyń densaýlyǵyn qorǵaý, olardyń tabysyn arttyrý jáne bıznesin qoldaý úshin elimiz boıynsha 500-ge jýyq sheshim qabyldanyp, júzege asyryldy.

Búginde  QR Prezıdentiniń tapsyrmasy boıynsha elimizde daǵdarysqa qarsy sharalardyń eki toptamasy júzege asyrylýda.

Elimiz boıynsha 4,5 mıllıonnan astam adamǵa 42500 teńge kóleminde qarjylaı kómek kórsetildi. Al, Mańǵystaý oblysynda osy qarjylaı qoldaýdy 153 197 adam alyp otyr.

«Nur Otan» partıasynyń «Biz birgemiz» aksıasynyń aıasynda jáne ózge de qaıyrymdylyq sharalary barysynda óńirde 20 000-ǵa jýyq azamatqa azyq-túlik pen turmystyq zattar úlestirildi.

Sonymen birge, komýnaldyq tólemderdiń tarıfi tómendetilip, ony tóleý úshin asa muqtaj jandar qosymsha kómek alýda.

Jalpylaı aıtqanda, úkimet deńgeıinde azamattardy qoldaý men bıznesti damytýǵa arnalǵan osy jáne basqa da sharalardy júzege asyrý úshin Ekonomıkalyq ósimdi qaıta qalpyna keltirý jónindegi keshendi jospar ázirlenip jatyr. Bul jospar jýyq arada bekitiletin bolady.